قصتي مع التسجيل في التاسعة حرة 2023- الثالثة اعدادي احرار

 سلام هاد المنشور موجه لصحاب باك احرار 2023 الناس لي خرجو من التاسعة ومنقاطعين هادي مدة على الدراسة وبغاو يتسجلو فباك ليبر ومعرفينش شنو يديرو قرا المنشور من لول لتالي واتعرف شنو دير بلا ما دوخ اول حاجة باش تقدر تسجل فباك ليبر خاصك تكون عندك تاسعة ولا تكون قريتها مكيهمش واش نجحتي فيها ولا لا او ممكن تدير تسجيل في التاسعة حرة 2023 اي الثالثة اعدادي احرار

 

 ثانيا غتمشي عند مول المكتبة غتقوليه يعطيك ملف ديال الترشح لباك حر راه داير غير شي 3 دراهم فيه 3 صفحات خاصهم يتعمرو اوى هنا تبع معايا مزيان صفحة لولة غتعمرها انت غتعمر غير المعلومات الشخصية ديالك انت ومن بعد ما تعمر ديك جهة غتشد داك الملف وغادي تمشي المقاطعة لي انت تابع ليها غيعمرو ليك صفحة ثانية فيها معلومات ديال الازدياد ديالك وهنا اتبقى ليك واحد صفحة هنا فين خاصك تمشي المدرسة لي نقاطعتي فيها من الدراسة باش يعمرو ليك شهادة الانقطاع وهاكا غتكون عمرتي الملف ديالك وتهنيتي منو وكيما سبقت وذكرت دير هادشي بترتيب ومتسولنيش علاش باش كلشي يمشي معاك مزيان بلا عكوسات وهنا غتكون كملت الملف ديالك،

 

 ثالتا غيخصك تسجل فسيت وهنا نصحك وخودها نصيحة مني تسجل عند شي مول سيبير حسن ليك باش هاكا تفادا انك تغلط فالمعلومات وانت كتسجل دي معاك لاكارط واحد تصويرة حيت غتحتاجهم وفاش غيكمل ليك تسجيل مول سيبير غيعطيك واحد لكود وخبيه عندك وغيخرج ليك زوج ديال الورقات شدهم وزيدهم على الملف ديالك وزيد دير فطوكبي لاكارط ديالك وشري واحد 4 لبراوات ومن بعد ما درتي هادشي كامل وجمعتي الملف ديالك هنا غتشد داك الملف وتمشي النيابة ديال المدينة لي انت فيها وغتقولهم انا جمعت الملف وبغيت نتسجل غيسولوك واش تسجلتي فسيت واش جمعتي الملف وانت غتقول اه ساااهلة😅 وهما غيعطيوك واحد زوج ورقات غتقوليك وحدة عمرها وݣاليزيها وحدة لا وانت غتزيد دوك جوج ورقات على الملف ديالك وغتشد طريق ديريكت المقاطعة لي انت تابع ليها وتقولهم يݣاليزيو ليك داك الملف كااامل كل الوراق لي فيه وحدة بوحدة وحتى الملف براسو وهاكا غتكون كملتي كلشي ما عليك غير ترجع النيابة وتعطيهم الملف ديالك وتخرج فحالاتك وهادشي راه مغيديش منك حتى يومين لا تبعتي هادشي لي قتلك بالحرف الواحد وبالتوفق الجميع ضربت براد أتاي مشحر وانا كنشرح ليكم هادشي😅 ولي بغا معلومات اكتر على الأساتذة لي يتبع معاهم ودروس بالنسبة لشعبة الآداب بالمسالك ديالها يتواصل معايا راه غنحط ليكم كلشي ان شاء الله

Plus récente Plus ancienne